Mitt eigið net

Mogginn fjallar um umdeilda auglýsingu:

„Á Biskupsstofu fengust þær upplýsingar að auglýsandinn yrði þó ekki kærður fyrir guðlast“

Þetta er um haustið 2007. Spænski rannsóknarrétturinn var lagður niður fyrir 173 árum og hafði þá ekki drepið neinn í átta ár. Við búum við ört skánandi vísindalegan skilning á hinu stóra og hinu smáa í heiminum og getum jafnvel grillt í árdaga hans. Við kunnum að erfðabreyta lífverum og greina þróun mannverunnar langt aftur í apaættir, ferðast út fyrir hnöttinn o.s.frv. Og mannréttindum og frelsi, sérstaklega tjáningarfrelsi, fleygir fram að flestu leyti.

En fólk talar enn í fyllstu alvöru um opinberar kærur og refsidóma … fyrir guðlast.

Voðalega ætlar þessi fjári að vera lífseigur.

Nokkrar orðskýringar:

Þynna

Þunn filma (foil) úr einhverju efni.

Álþynna

Það sem Becromal framleiðir, þunn filma úr áli. Eins konar þunnur og vandaður álpappír.

Þéttir (capacitor)

Íhlutur í rafrásum, yfirleitt búinn til úr upprúlluðum þynnum (oft álþynnum), svona eins og samlokur eru búnar til úr brauði (oft heilhveitibrauði). Becromal framleiðir ekki þétta.

Aflþéttir (power capacitor)

Tiltekin gerð af þétti sem ekki hefur komið sérstaklega við sögu í umræðunni. Álþynnurnar frá Becromal má nota í slíka þétta en líka í aðrar tegundir þétta. Þannig hafa þynnurnar ekkert sérstakt með afl að gera þótt til séu þéttar sem heita aflþéttar. Eins förum við ekki að kalla allt brauð „heilsubakstur“ bara af því að Sómi framleiðir samloku sem heitir Heilsubiti.

Aflþynna

Bullorð, líklegast soðið saman til að þurfa ekki að nota grýluorðið „ál“ vegna útbreiddrar álþykkju.

Nú hefur ráðherra þó bitið á jaxlinn og tekið upp orðið „álþynna“ á vef sínum. Hann heldur samt enn að það sé íslenskun á „capacitor,“ þrátt fyrir ítrekaðar leiðréttingar á hans eigin vef og víðar. Þetta er hliðstætt því að halda fast í þá skoðun að „brauðsneið“ sé firnagott nýyrði yfir „sandwich“ — bara af því að maður er ekki alveg með á hreinu hvað „sandwich“ er.

Iðnaðarráðherra fjallar á netmiðli sínum um fyrirtækið Becromal, sem:

framleiðir það sem við höfum kallað aflþynnur. Það er íslenskun á útlenska orðinu “capacitor”. Aflþynnur eru rafhúðaðar álþynnur sem eru notaðar í rafþéttaiðnaði.

Ef ráðherra hefði leitað til Orðanefndar RVFÍ hefði hann vitað að íslenskun orðsins „capacitor“ er „þéttir“ og hefur verið það áratugum saman. Margir þéttar eru smíðaðir úr þessari framleiðsluvöru Becromal, sem er að sönnu þunn en hefur lítið með afl að gera (þótt þéttar úr svona þynnum séu meðal annars notaðir í aflgjafa).

Annars er óþarft að leita langt yfir skammt að heiti þessarar vöru: á vef fyrirtækisins heitir hún „aluminium foil.“ Þá uppfinningu hafa Íslendingar þekkt áratugum saman og kallað álpappír. Sá álpappír sem er notaður í þétta er væntanlega þynnri og vandaðri og dýrari. Hann er nú samt álpappír.

Það þótti kannski ekki hljóma nógu svalt og hátæknilegt?

Mitt eigið net óskar landsmönnum og norðurhvelsbúum öllum gleðilegrar sumarsólstöðuhátíðar. Það er núna kl. 18:06 sem norðurpóllinn vísar næst sólu.

Skemmtilegur fídus: í kvöld verður sólsetur kl. 00:03 — þrjár mínútur yfir miðnætti.

Við ættum kannski einhvern tíma að þoka okkur yfir í rétt tímabelti.

Þennan dag fyrir tíu árum lést Karen Wetterhahn efnafræðingur úr kvikasilfurseitrun.

Hún hafði misst einn eða tvo dropa af tvímetýlkvikasilfri (dimethylmercury) á hanskann sinn. Fimm mánuðum síðar varð hún vör við truflanir í taugakerfinu: jafnvægismissi og drafandi tal. Á spítala mældist kvikasilfrið í blóði hennar við tuttuguföld eitrunarmörk. Hún féll í dá þremur vikum eftir fyrstu einkennin, og tórði í því dái í nokkra mánuði.

Vitað var að efnið væri mjög eitrað, en ekki að það færi í gegnum flesta hanska á nokkrum sekúndum. Það uppgötvaðist ekki fyrr en Karen Wetterhahn veiktist.

Mórall sögunnar: það er hægt að fylgja reglunum til hlítar, gera allt rétt og af dugnaði og samviskusemi, og verða samt taugaskemmdur spítalamatur og deyja langt á undan áætlun. Bara af óheppni.

Hundskumst því til að lifa lífinu á meðan okkur helst á því.

Þetta var lífsgleðiboðskapur dagsins frá Gunnlaugi. Nýtið vel.

Læknareglan er þarft og verðugt einkaframtak Hauks Dalmar og Auðar Þorkelsdóttur í litlu húsi á Hverfisgötunni. Þau stunda þar trúfræðilegar lækningar og lækna þannig ótrúlegustu mein, meðal annars öll krabbamein:

Árið 1996 byrjuðum við að rannsaka krabbameinsæxli og þróa aðferðir til þess að finna og uppræta mismunandi tegundir af krabbameini. Í dag getum við læknað allar tegundir krabbameins, á hvaða stigi sem sjúkdómurinn er, án allra aukaverkana.

Eiginlega má furðu sæta að lækningabylting Hauks og Auðar hafi ekki farið hærra, því að árangurinn er sláandi:

Við höfum í öllum tilvikum getað sýnt fram á trúfræðilegar lækningar okkar með sönnunum [...] Í öllum tilvikum svo okkur sé kunnugt um, eru sjúklingar okkar lausir við veiruna.

Og hefðbundin læknavísindi eru ekki einu sinni komin svo langt að vita að krabbamein sé veirusýking!

Vefur Læknareglunnar vísar á vef Krabbameinsfélagsins um nánari upplýsingar. Illu heilli hefur Krabbameinsfélaginu láðst að endurgjalda tengilinn — en við getum nærri getið hvað þar liggur að baki.

Fordómar og vísindahroki halda þeim Hauki og Auði eflaust niðri. Læknaklíkan er valdamikil og verndar stöðu sína; læknum hlýtur að þykja neyðarlegt að allt þeirra vísindabrölt hafi ekki náð þeim árangri sem þessi sómahjón hafa náð með trúnni einni saman. Þeir telja hjónin kannski til læknamiðla, en eins og Haukur segir: „Við eigum ekkert skylt með miðlum, þeir starfa á jarðneska sviðinu. Við störfum í himnaríki.“

Sú vinnuaðstaða hefur mikla kosti, því að við störf sín njóta Haukur og Auður fulltingis 58 lækna og 76 hjúkrunarfræðinga — allra framliðinna.

Í miklum mannraunum hlýtur Læknareglan að birtast eins og vin í eyðimörkinni, hjálpræði í dýpstu örvæntingu. Það er stórkostlegt til þess að hugsa að fólk í sárri neyð eigi kost á að leita hjálpar hjá hjónunum í litla húsinu á Hverfisgötunni, gegn vægu verði. Verðlagið kemur raunar ekki fram á vef Læknareglunnar en við hljótum að ætla að þau Haukur og Auður rukki af sanngirni, sér í lagi þegar litið er til þess hvílík undur fást fyrir peningana.

Framtak Læknareglunnar er lofsvert og ætti að verðlauna ríkulega bæði hér og í efra — öfugt við t.d. þá sem nýta sér örvæntingu og trúgirni ólánssams fólks til að plokka af því peninga, svo að dæmi sé tekið af algeru handahófi. Slíka óþokka ætti að loka inni og týna lyklinum. En hjónin á Hverfisgötu? Fálkaorðuna fyrir þau!

Í frétt á mbl.is:

Alþjóðlega guðfræðinefnd Páfagarðs hefur sent frá sér skjal, sem ber yfirskriftina „Von um frelsun ungabarna sem deyja óskírð”. Þar kemur fram að eftir áratuga rannsóknir sé ljóst að óskírð börn, sem deyja, lendi ekki í forgarði vítis eins og til þessa hefur verið haldið fram.

Það er væntanlega flestum ljóst að þetta „rannsóknastarf“ sé kjánalegt. Samt þykir einhvern veginn ljótt að segja það upphátt. Hinir eldri sussa og segja „maður segir ekki svona.“

Kannski þykir sú hreinskilni ljót af sömu ástæðum og það þykir ljótt að sparka í liggjandi mann. En kaþólska kirkjan er með allra ríkustu og valdamestu liggjandi mönnum, og hefur feiknalega stjórn á hugum hundruða milljóna manna. Ég er bara mátulega vel stæður og það er rétt svo að ég stjórni mínum eigin huga. Ég held það sé óþarft að verja kaþólsku kirkjuna fyrir mér.

Þegar ég er skammaður fyrir að sparka í þennan liggjandi mann er það svolítið eins og mús sé skömmuð fyrir að sparka í tána á dauðvona risaeðlu.

Það er athyglisvert að orðalagið „áratuga rannsóknir“ sé notað. Er þetta tilraun kirkjunnar til að hljóma trúverðug, að láta eins og hún leiti sannleikans á eins agaðan og gagnrýnan hátt og vísindamenn?

Ætli „rannsóknir“ kaþólsku kirkjunnar leiði einhvern tímann í ljós t.d. að getnaðarvarnir séu raunar ekki syndsamlegar, eða samkynhneigð ekki viðurstyggð? Það er kannski bjartsýni, en hún uppgötvaði jú fyrir fimmtán árum að hún hefði nú kannski komið svolítið illa fram við Galíleó … 350 árum eftir að hann dó í stofufangelsi fyrir örgustu vísindaiðkun. Kirkjunni er ekki alls varnað.

Maharishi Mahesh Yogi

<háð>

Stofnun háskólans Maharishi University of Management í Iowa í Bandaríkjunum er eitt margra góðverka sem Maharishi Mahesh Yogi hefur unnið mannkyninu til heilla og heilsubótar.

Lýsingar námskeiða í stærðfræðideild þessa skóla gefa fyrirheit um spennandi nýjungar í túlkun stærðfræðinnar. Hér eru nokkur dæmi:

• Infinity: From the Empty Set to the Boundless Universe of All Sets — Exploring the Full Range of Mathematics and Seeing its Source in Your Self
• Maharishi Vedic Mathematics: Mathematical Structure and the Transcendental Source of Natural Law
• Calculus 1: Derivatives as the Mathematics of Transcending, Used to Handle Changing Quantities
• Calculus 2: Integrals as the Mathematics of Unification, Used to Handle Wholeness
• Calculus 3: Unified Management of Change in All Possible Directions
• Calculus 4: Locating Silence within Dynamism

Þessi jákvæði jógi hrinti af stað byltingu í varnarmálum nú í febrúar með vef sínum „Invincible Defence“. Þar lýsir hann hvernig útrýma megi hryðjuverkum fyrir fullt og allt, meðal annars með stóraukinni ástundun jógaflugs. Þetta er auðskýrt: jógaflugmenn eru í ofurleiðslu sem framkallar Maharishi-hrifin, á svipaðan hátt og ofurleiðni framkallar Meissner-hrifin. Rétt eins og ofurleiðandi efni býr yfir „invincible defence“ gegn segulsviði reisa ofurleiðslujógar órjúfanlegan varnarmúr þjóðar gegn hryðjuverkavá.

Vonandi meðtaka allir sannindi jógans með opnum huga, ótruflaðir af hinum alræmdu fordómum vísindanna.

</háð>