X-Hvað — lóð á hvaða vogarskálar?
Þrymur Sveinsson og Borgar Þór Einarsson skrifa um X-Hvað-prófið og telja það vinstrisinnað, Samfylkingin og VG komi óeðlilega oft best út.
Könnum það. Mögulegar samsetningar svara í prófinu eru aðeins 511 = 48.828.125 talsins. Það er ekki neitt neitt. Ég renndi snöggvast í gegnum þær allar og tók saman hve oft hver flokkur „vann.“ (1)
Ég útbjó forrit til að keyra prófið hratt; stigaútreikningurinn kemur fram í viðauka í skjali Bifrastarnema. (2)
Niðurstöðurnar voru þessar: (3)
| Sjálfstæðisflokkur vann | 9.863.828 sinnum, eða í | 20,2% tilfella, | og fékk að meðaltali | 30,0% stuðning. |
| Framsóknarflokkur vann | 9.383.533 sinnum, eða í | 19,2% tilfella, | og fékk að meðaltali | 30,0% stuðning. |
| Samfylkingin vann | 9.753.252 sinnum, eða í | 20,0% tilfella, | og fékk að meðaltali | 30,0% stuðning. |
| Vinstri græn unnu | 11.731.274 sinnum, eða í | 24,0% tilfella, | og fengu að meðaltali | 30,0% stuðning. |
| Frjálslyndi flokkurinn vann | 8.690.555 sinnum, eða í | 17,8% tilfella, | og fékk að meðaltali | 30,0% stuðning. |
| Íslandshreyfingin vann | 7.711.475 sinnum, eða í | 15,8% tilfella, | og fékk að meðaltali | 30,0% stuðning. |
Í niðurstöðunum kemur sannarlega fram dálítil slagsíða til vinstri, þó ekki meiri en svo að Sjálfstæðisflokkur vinnur pínulítið oftar en Samfylkingin. Einbeittur brotavilji er varla fyrir hendi.
Heldur hallar á undirmálsflokkana tvo (þið vitið, þessa sem ganga út á að senda ýmist stóriðju eða lélega rúmenska harmónikkuleikara út í hafsauga). Þeir fá minnsta „fylgið“ í þessu prófi; þó er það margfalt meira fylgi en þeir mega vænta á kjördag.
Það er bráðskemmtilegt að formanni Sambands ungra sjálfstæðismanna þyki „ekki vera nokkur leið að taka prófið án þess að út úr því komi að maður eigi helst samleið með Samfylkingunni eða VG.“ Prófið er ofurlítið hlutdrægt en engan veginn nóg til að skýra þessa miklu erfiðleika. Kannski er formaður SUS bara á rangri hillu!
(1) Auðvitað er þessi greining óvísindaleg; raunveruleg svör eru varla jafndreifð yfir mengi mögulegra svara. Til dæmis eru væntanlega frekar fáir á móti bæði stóriðju og útlendingum og jafnframt hlynntir einkavæðingu heilbrigðisgeirans og ríkisstofnana, skólagjöldum í ríkisreknum háskólum, kvótakerfinu, og Evrópusambandsaðild. Samt vega svo ólíkleg svör jafnt á við öll önnur í þessari óformlegu tilraun minni. Þetta er nú líka bara til gamans gert.
(2) Ég þurfti að giska dálítið í eyður; viðaukinn hefur ekki verið uppfærður þegar elleftu spurningunni og Íslandshreyfingunni var bætt við. En þetta ætti að vera nærri lagi.
(3) Já, þessar prósentutölur eru meira en 100% samtals. Þegar tveir flokkar eru jafnir með flest stig teljast báðir vinna.
May 10th, 2007 at 6:34 pm
óháð niðurstöðu formanns SUS, þá ætla ég ekki að deila um þá fullyrðingu að kannski sé hann á rangri hillu… :)
-0-0-0-
Fyrir utan eðlilega vankanta svona prófa (fólk tekur oft ákvörðun vegna einstaklinga sem eru í framboði en ekki stefnumála) þá er þetta áhugaverð spurning. Hvað er besta ‘random’ niðurstaðan?
Væri prófið fullkomlega hlutlaust ef allir flokkar hefðu jafn mörg tilvik ráðandi fylgis í öllu mengi mögulegra niðurstaða? eða ætti hver flokkur að fá sirka það fylgi sem hann fær í skoðanakönnunum… eða ætti jafnvel prófið að vera “adaptive” þannig að spurningar detta út eða koma nýjar inn eftir því hvernig fólk er að svara fyrri spurningum? t.d. ef allir eru sammála um spurningu A, ætti þá að bæta við spurningum til að sjá hvar fólk fer að splittast í hópa?
Hjalti.