Skemmtifjölpóstur
Fýlupúki.
Elsku/Kæra/Kæri ________,
þú ert mér mjög kær og mér þykir vænt um þig og ég vil síst af öllu særa þig … en þú veist að ég vil ekki fá svona póst, er það ekki?
Flestir svona fjölpóstar hafa farið marga túra um netið og lent í boxinu mínu oftar en einu sinni … og fæstir kættu mig neitt að ráði í fyrsta skiptið, hvað þá það fimmta.
Auk þess framsenda margir póstinn ásamt öllum netföngum viðtakenda svo að hann inniheldur brátt fleiri hundruð netfanga, þar á meðal mitt, og fleytir þeim út um allan heim. Loks ratar hann til þeirra sem safna netföngum til að senda öllum heiminum ruslpóst með auglýsingum um typpastækkanir og klámvefi og viagra. Já, þeir safna markvisst netföngum úr svona pósti. Þeir kunna þér bestu þakkir fyrir stuðninginn.
Betra er að setja netföngin í Bcc (blind carbon copy) svo að þau fylgi ekki póstinum áfram. Best er þó að framsenda ekki svona póst, eða a.m.k. bara til þeirra sem þú veist að vilja fá hann. Þú gætir líka opnað blogg og birt þetta þar, og þá gætu þeir lesið það sem sækjast eftir því.
Ég bið þig alltént að sleppa mér úr listanum framvegis. Án þess að meina neitt illt með því eða vilja móðga neinn. Ég veit að þér gengur gott eitt til, og kann að meta það. Þetta veitir mér bara ekki þá gleði sem þú vonaðir, og veldur skaða sem þú vissir ekki af.
(Þegar þú sendir þitt eigið frumsamda skemmtiefni vil ég hins vegar gjarnan fá það. En fyrir alla muni settu þá netfangið mitt í Bcc ef þú sendir það á fleiri um leið.)
Bestu kveðjur,
— ________
Notið að vild.
September 28th, 2006 at 2:16 am
Unaðslegt, verst með hvað þetta kveikir margar afar-slæmar hugmyndir.
En annars held ég að framtíðin sé white-filter, hætta að taka við pósti frá hverjum sem er.
Ef viðkomandi sendandi er ekki skráður á white-filter fær hann póst til baka með möguleika að komast á whitelist fyrir 70kr – eða tilmæli um að hringja í viðkomandi til að bæta sér á whitelist (símanúmer fylgir augljóslega ekki).
Hversu mörgum gríðarlega mikilvægum bréfum myndi maður tapa?