MMCXXV
Í gær varð amma mín 93 ára gömul. Mæld meðalævilengd íslenskra kvenna árið sem hún fæddist var 61,23 ár [heimild], og þótti líklega harla gott.
Mæld meðalævilengd íslenskra karla árið 2004 var 78,90 ár skv. sömu heimild.
Systkinasynir mínir eru fæddir á síðustu árum. Gerum ráð fyrir að þeir gæti heilsunnar álíka vel og langamma þeirra hefur gert. Ætli þeir haldi upp á afmæli með bros á vör árið 2125?
June 27th, 2006 at 5:51 pm
Hreinlega ekki loku fyrir það skotið að einhver þeirra haldi upp á afmæli með bros á vör árið 3125. Maður veit ekki með framtíðina. Ennþá. Grínlaust þá þætti mér það ekki ótrúlegt að þeir sem verði lifandi við næstu aldamót eigi einnig fræðilegan möguleika á að sjá næstu árþúsundamót.
June 27th, 2006 at 6:09 pm
Sumum þykir líklegra að þeir sem verði lifandi við næstu aldamót verði bara kakkalakkar og gerlar, af því að þeir eru svo þrautseigir í kjarnorkuvetrarhörkunum.
Ég er líklega einhvers staðar á milli þessara póla. :) Einhverjum okkar gæti vel auðnast að þreyja kjarnorkuþorrann þegar hann kemur. En þótt okkur hafi vissulega gengið betur og betur að tóra undanfarna áratugi, þá er rétt að minnast vísdóms verðbréfasalanna: „past results are not necessarily an indicator of future performance.“
June 28th, 2006 at 3:50 pm
Líkurnar á að drepast af völdum kjarnorkuveturs eru sennilega hverfandi miðað við líkurnar á að drepast af slysförum, vera myrtur eða farast í náttúruhamförum. Spurningin er hversu lengi manni tækist að lifa af ef elli og sjúkdómar væru ekkert vandamál. Held að það gæti orðið ansi lengi ef maður léti það vera að aka um á mótorhjólum.
Hvað varðar framtíðarrýni með aðstoð extrapóleringar þá er það vissulega ómarktækt, nema þegar litið er til skemmri tíma. Enda reikna ég fastlega með því að fyrir næstu aldamót verði læknivísindin búin að finna lækningu við öldrun og með því bötta þá takmörkuðu aukningu í lífslengd sem hingað til hefur átt sér stað. Gæti hljómað eins og bjartsýni, en ég reikna þó kalt með því að gegnumbrotið komi ekki fyrr en daginn eftir að ég drepst úr elli.
June 28th, 2006 at 4:19 pm
Á lista yfir það sem líklegt er að drepi tiltekinn einstakling væri kjarnorkuvetur vissulega neðarlega.
Á lista yfir það sem líklegt er að drepi allt mannkynið væri hann eitthvað ofar. Og þó; af nógu er að taka.
Annars er áhugavert að þú nefnir náttúruhamfarir, eins og undirskilið sé að kjarnorkuvetur teljist ekki til þeirra. Ég hafði ekki hugsað út í það. Ætli orðið „náttúruhamfarir“ eigi að fela í sér að náttúran sé gerandi og mannkynið þolandi? Þá er kjarnorkuvetur einmitt hið öfuga, og mætti kallast „mannkynshamfarir“ eða „misviturrastjórnmálamannahamfarir,“ eða nánar tiltekið t.d. „bandaríkjaforsetahamfarir“ ef út í það færi.
Um „lækningu“ öldrunar: það sem mér fannst mest sannfærandi var kaldhæðnin um daginn eftir dauðdaga þinn. (Það sem fær mann til að brosa er sannfærandi. Það er sennilega ekkert heppilegt, út af fyrir sig.) En ég er efins um að hugtakið „lækning öldrunar“ meiki yfirleitt sens.
Öldrun er (örugglega, en IANAD) skrilljón mismunandi tegundir banvænnar hrörnunar, sem flestallar hrjá holdið fyrr eða síðar. Við gætum ráðið bót á þeim n tegundum hrörnunar sem yfirleitt koma fyrstar, en það slær bara ellidauðanum á frest; það fyrirbyggir hann ekki. Ekki heldur þegar við sigrumst á þeirri (n+1)-tu (og þegi þú Sorites.) Mölur og ryð og forgengileiki holdlegrar tilveru og allt það. Jájá, holdið verður kannski úrelt og við lifum líkama okkar eins og Svarthöfði og svífum yfir vötnum og snúum þyngdaraflinu við og förum hraðar en ljósið og allt það, og veistu, ég held það verði ekki á minni ævi.
En ég hélt nú líka að ég myndi aldrei drekka kaffi.
June 28th, 2006 at 8:13 pm
Viltu veðja? http://www.longbets.org/11
June 29th, 2006 at 3:46 pm
Skemmtilegur vefur! Ágætt að þeir birta öll ártöl með fimm tölustöfum, en óvíst að það nægi … þetta veðmál verður til dæmis varla útkljáð fyrr en eftir alveg sérstaklega langan tíma.