Mitt eigið net

Endurfyrirlöngu vann ég sumarlangt sem forritari í Íslenskri erfðagreiningu. Daginn sem ég hætti var einmitt Skeggi nokkur að byrja. Fyrirtækið var í sprengivexti og mikill sætahörgull í gamla húsinu á Lynghálsi, og sætið mitt varð sætið hans Skeggja. Hann varð mjög vel metinn stjórnandi í hugbúnaðarþróuninni þar.

Spólum nú áfram til ársins 2006; ég er forritari í vefdeild Landsbankans og Skeggi er orðinn forstöðumaður annarrar hugbúnaðardeildar bankans, og á labbi þar á ég dálítil small-talk-orðaskipti við mann í þeirri deild sem þekkir mig samaogekkineitt. Í tal berst að ég hafi einhvern tíma verið í Decode, og ég segi „já, það vill svo til að Skeggi tók sætið mitt þegar ég fór. En ég var nú bara í sumardjobbi þarna.“

Lengra varð samtalið ekki, þar sem ég var á gangi með vinum mínum. Þeir bentu mér á hvernig þetta hljómaði.

Ég meinti auðvitað að Skeggi tók beinlínis stólinn sem ég sat á og borðið sem ég sat við — húsgögnin sjálf. En nú virðist ég hafa slysast til að gefa í skyn, við menn sem eru rétt að kynnast mér, að Skeggi hefði tekið við starfinu mínu … semsagt að hin vel metnu stjórnunarstörf hans hjá Decode hafi verið „iss, bara sumardjobb“ fyrir 22 ára háskólanemann mig.

Úbbs.